ઘઉંના ખારા જીરા બિસ્કીટ (પ્રેશર કુકરમાં) બાળકો અને મોટા બેય ને દૂધ/ચાના સમય પર જો આ બિસ્કીટ આપો , મજા પડી જશે. ઘઉંના લોટમાંથી બનાવેલ , અંડારહિત આ જીરા બિસ્કીટ ખુબ જ સ્વાદિષ્ટ છે . ઘર ની સામાન્ય વસ્તુઓમાંથી બનતા આ બિસ્કીટ એક વાર જરૂર ટ્રાય કરજો ,,
સામગ્રી :
• ૧.૭૫ (પોણા ૨ ) વાડકા ઘઉંનો- લોટ,
• ૧૦૦ gm બટર,
• ૧/૨ વાડકો ખાંડનો ભૂકો,
• ૧ નાની ચમચી મીઠું,
• ૧ ચમચી બેકિંગ પાવડર,
• ૧/૨ ચમચી બેકિંગ સોડા (ખાવાનો સોડા ),
• ૫ મોટી ચમચી દૂધ,
• ૧ થી ૧.૫ ચમચી જીરું,
રીત :
સૌ પેહલા એલ્યુમીનીયમનું જાડા તળિયા વાળું કુકર ધીમી આંચ પર ગરમ મુકો.એમાં એક ઉંચો કાંઠો કે કોઈ સ્ટેન્ડ મૂકી દેવું . કુકરની તળિયાની સપાટી સીધી હોય એવું લેવું.
બટર અને ખાંડના ભૂકાને ફૂલે ત્યાં સુધી ફેટવું ..
બીજા બાઉલ માં ઘઉંનો લોટ, બેકિંગ પાવડર , બેકિંગ સોડા , મીઠું બધું ચાળી લેવું .
આ લોટના મિશ્રણ ને બટર+ખાંડના મિશ્રણમાં ઉમેરો. પોણી ચમચી જીરું ઉમેરી દો ..
સરસ રીતે મિક્ષ કરો. ધીરે ધીરે થોડું થોડું દૂધ ઉમેરતા જાઓ . દુધ જરૂર મુજબ જ ઉમેરવું . લોટની જેમ તૈયાર થઇ જશે. આ લોટ ઢીલો હોવો જોઈએ, ચીકણો નહિ ..
પાટલા પર એક મોટી જાડી રોટલી વણો .. એના પર જીરું ભભરાવો. વેલન ને ૨-૩ વાર વણેલી રોટલી પર ફેરવી દો જેથી જીરું એમાં ચોટી જાય .
કુકીસ કટરની મદદ થી આપ ને જે આકાર આપવો હોય એ પ્રમાણે કાપી લો.આ કાપેલી કુકીસ ને ઘી/તેલ લગાવેલા કેક ના વાસણમાં કે સ્ટીલ વાસણમાં ગોઠવો. બહુ નજીકના ગોઠવો કેમ કે બેક કરવામાં એ ફૂલશે .
આ કુકીસ મુકેલુ વાસણ કુકરમાં ગોઠવી દો, કુકર ને બંધ કરી લો. સીટીના લગાવો . રીંગ ભરાવેલી ચાલશે . ૨૪-૨૭ min માટે બેક કરો.
ઓવનમાં બેક કરવા માટે ૧૭૦c પર પ્રી-હીટ કરી ૧૨-૧૫ min માટે બેક કરો . કુકીસ કિનારીથી બ્રાઉન કલર થવા માંડે એટલે કાઢી લેવી.
કુકીસ ગરમ હોય ત્યારે પોચી લાગશે , ઠરશે એમ કડક થઇ જશે . પૂરી રીતે ઠરે પછી જ ડબ્બામાં ભરો.
આશા છે તમને પસંદ પડશે આ કુકીસ …
રસોઈની રાણી : રુચી શાહ (ચેન્નાઈ)
મિત્રો, આપ સૌ ને મારી આ રેસિપી કેવી લાગી ? કોમેન્ટ માં અચૂક જણાવજો…જેથી નવી વાનગી આપવા માટે મને ઉત્સાહ રહે…
દરરોજ અવનવી વાનગી માટે લાઇક કરો અમારું પેજ – રસોઈની રાણી.
આપણી માતૃભાષા 21મી સદીમાં પણ જીવંત રહે અને નવી પેઢીને એનો લાભ મળે એ માટે અમે રોજ નવી સ્ટોરી, રસપ્રદ લેખો, ઉપયોગી માહિતી, લાઈફ ઇઝી ટિપ્સ, નવી નવી વાનગીઓની વણઝાર તમારા ફેસબુકમાં લાવવા કટિબદ્ધ છીએ !
– તમારો જેંતીલાલ